ورحنا الاستديو بعروسه من غير بوكيه
الحمد لله البوكيه وصل بعدنا بخمس دقايق
ناس سالونى : مش هتدخلى معاهم
انا : لا هما هيدخلوا لواحدهم
الناس : ازاى دا انتى اخت العروسه
وهما دخلوا يتصورا واحنا واقفين بره دخلوا ما يقرب من ساعه مش فاهمه هما كانوا بيحضروا عفاريت جوه
انا : اخييييييييييييييييييييييي يييييييييييرا كنتوا خليكوا كمان شويه احنا مش مستعجلين
ورحنا القاعه من غير اصابات الحمد لله بعد اللى اتعمل فى الزفه
طلعنا كلنا على فوق على ما هما ينزلوا من العربيه والكلام الهلس ده
خمس دقايق بالظبط وكله قام يرقص
كل شويه حد يجى ايه ده انتى مش هترقصى ( حسسونى انى كنت بشتغل رقاصه قبل كده مع انى عمرى ما رقصت حتى مع نفسى )
ولو قولت لحد لا مش هرقص الاقى الردود ازاى دا انتى اخت العروسه
الحمد لله الخطوبه عدت على خير ورجعنا البيت طبعا العريبات كلها تحت بيتنا والشارع كله صحى اساسا المهم لقيت بابا بيقولى
بابا : هتيجى معايا نروح نجيب اكل من بره
انا : وهو ده وقت اكل
بابا : خطيب اختك هيتعشى معانا
انا : طب ما يروح يتعشى فى بيتهم 
(كنت برخم بس والله مش بخل ولا حاجه)
بابا : جايه ولا مش جايه ؟؟؟
انا : معاك يا معلم
بابا : معلم ..... ربنا يصبرنى على ما بلانى
انا : ااااااااااااااامين 
روحنا الحمد لله ورجعنا بالسلامه
وسلمى يا سلامه روحنا وجينا بالسلامه
ماما بدات تحط الاكل والامور اتظبطت الحمد لله
ماما : ناديهم بقى علشان ياكلوا وادخلى اوضتكم
انا : ايه ده هو احنا مش هناكل
ماما : لما هما يخلصوا
انا : لا انا مليش دعوه انا هاكل معاهم
ماما : لا
انا : لا هاكل
رحت وديت الاكل ليهم ( مجبره والله )
...........: هتاكلى معانا
انا : لا
............ : ليه ؟؟؟
انا : اتفضلوا انتوا الاول
....... : لا يا بنتى ازاى لازم انتى واخواتك تاكلوا معانا دا حتى انتوا اخوات العروسه
والحمد لله من يوميها كرهت ابقى اخت العروسه
ان شاء الله ممكن ابقى اكتب الفرح بقى اصل انا اخت العروسه
او اكتب للنونو اللى جه اصل انا خالتوووووووو 