تم نشر هذه المقالة فى كتاب زعتر 2 الموجود حاليا بالأسواق
جارتي أم حمادة لديها ابنة في
سن الزواج؛ عرضت عليـهـا
عريساً من معارفي حيثُ أنها
منذ سنوات تلح عليَّ في البحث
عن عريس مُناسب لابنتها.
وما إن لاحَ هذا العريس فــي
الأُفق حتى اعتدلت أم حـمـادة
في جلستها وسألتني باستعلاء : جاهز؟!!!
- هو إيه اللي جاهز؟!!
- العريس طبعاً.
- مش فاهمة.. يعني إيه جاهز ويعني إيه تفصيل؟!!
- بنتي جاهزة من مجاميعه ؛ مخلصة كُليتها وعندها كل حاجة من الإبرة للصاروخ .
- لم تسألي يعني عن دينه أو خلقه أو أصله أو فصله ؟!!
- كل الحاجات دي نسأل عليها لما نوافق على المبدأ.
- وإيه هو المبدأ؟!!
- إن يكون عنده شقة مش أقل من 4 غرف ؛ في مكان لائق ويدفع مهر مش أقل من 30 ألف ومؤخر50 ألف وشبكة 10 آلاف ؛والنجف والسجاد والمطبخ والأجهزةالكهربائية عليه.
- و لو ما معهوش يجيب كُل ده ؟!!
- يبقى ما ينفعش .
- غريبة .. مع إنه نفع معايا واللهِ .. لما اتقدم لي صاحب الخُلق والدين والأهل الطيبين اتجوزنا باللي كان حيلته.
- على الأقل الشقة … دي حد أدنى .
- وليه ما يأجرش قانون جديد؟!!
- ما ينفعش.
- طيب إيه رأيك إني اتجوزت في شقة مفروشة لغاية ما ربنا فرجها من غير نجف ولا سجاد ولا كل اللي بتقولي عليه ونفع.
- ليه كفى الله الشر؟!! هو حضرتك يعني ولا مؤاخذة كُنتي متجوزة عُرفي لا سمح الله ؟!!!
- لأطبعاً .. كُنت متجوزة علي سُنة الله ورسوله .. السنة اللي بتقول ( إذا جاءكم من ترضون دينه وخُلقه فزوجوه ) مش ( إذا جاءكم من يدفع أكثر فزوجوه )..
أمال شبابنا ليه بيتجوز عُرفي؟!! ما هو من تشدُد الأهل وارتفاع تكاليف الزواج والسيوف المُسلطة على رقبته .. ليه ما نسهلهاش فربنا يسهلها علينا؟!!
ليه لما نلاقي الشخص المُناسب ما نساعدهوش علشان يعف نفسه ويحصن ويعف بنتنا …
ليه ما ينفعش يسكُن مع مامته حتي ولو هي قاعدة لوحدها؟!!
وما ينفعش يسكُن غير في شقة تمليك وفي حي راقي؟!!
وما ينفعش ما يدفعش مهر الشيء الفُلاني؟!!
وما ينفعش ..وما ينفعش…
ليه ما نخليش العُرفي يبقى رسمي وبرضانا بدل ما يتم غصبن عننا ومن ورانا؟!!
واللهِ ربنا هيسألنا كأولياء أمور عن تفشي الفواحش وما يُسمى بالزواج العُرفي أو الزنا المُقنع وارتفاع نسبة العنوسة والعزوبية في ولادنا …
ليه يا أم حمادة ما ينفعش ؟!! ليه؟!!
ياللا نتجوز عرفى
العرض العادي
