تحية طيبة منى ليك .. وبعد
كان في ديما حلقة وصل بينى وبينك جوايا وجوا قلبى مكنتش بعرف اطلعها .. حاجة كده جوايا كنت بحسها اوى كتير ومكنتش بعرف اطلعها ..
مش عارف ليه .. مع انى مش عاجز انى اعبر عن حاجة جوايا .. وياما عبرت عن حاجات جوايا وكتبتها وقولتها ..
جيت عندك وكأن لسانى دا اتخرس ومعدتش بعرف اتكلم ..
يمكن عشان انت متتوصفش؟
ولا يمكن عشان الكلام عنك او في وصفك او حتى التعبير عن حبك ميكفيش بكل حروفه ...
يمكن عشان النور قوى .. اخترق نظراتى ودقات قلبى وخلانى اتخرس..
اه .. هوا كده .. ماهو لو مكنش كده امال هايكون ايه؟
ربنا خلقك واحد .. واحد مالوش مثيل .. حتى لو كنت بشر زينا ..
بس انت النور .. انت الى عملتنى وعلمت غيرى سكة النور دا..
فاكر العتمة والضلمة؟
فاكر لما كنا بنخبط في بعض من الكره والسواد والحقد والخوف والفساد و و و و ..
بقلب من نور وكلام من بلسم .. نورت القلوب دى ..
العتمة راحت .. والضلمة اختفت .. بقى في حب و مودة ورحمة وخير ورقى وبياض ..
بيشتموك؟
اه .. بيشتموك للاسف ..
بس انت سبت قلوب عامرة بحب المولى وبعدين حبك ..
قلوب مهما اسودت فيها نقطة نور ..
نقطة نور خلتهم يغلوا من جواهم .. ويساورهم مشاعر الغضب والرفض ومش بس كده .. لا كمان التعبير
التعبير عن الغضب والرفض دا ..
يشتموك ازاى بس واحنا اتربينا على حبك ..
عارف..
كتير اوى من ابهات وامهات لما بيخلفوا بيسموا ولادهم على اسمك ..
بلاد كتير اتملت باطفال وشباب ورجالة على اسمك ..
محدش دفعلهم عشان يعملوا كده..
دا الحب ..
لا النور والرحمة .. هما الى خلوهم يعملوا كده..
احنا مقصرين ..
ايوه مقصرين .. بس متزعلش مننا ..
احنا محتاجينك .. يوم هانكون فيه قدام رب كريم ..
والله الى خلقك و خلقنا مش هانفضل كده نايمين ..
مش انت سبت النور وسبت الرحمة جوانا ..
هايطلعوا والله وقريب اوى..
انا اسف .. وكمان اسف انى مقولتش اسمك ..
بس حروف اسمك واسمك مش كلمة بسيطة بتتكتب وتتقال ..
دى ببتدرس بالقلب قبل العين والعقل ..
بتتدرس عشان نفهم المودة والرحمة والنور دا كله ..
ويارب نفهم ..
انا اسف انت اعظم من اى حاجة ومن كل حاجة..
اعظم من كل وصف.. بس انا مضطر اتكلم كده باسلوب الكناية ولا التورية ولا مش عارف بيسموه ايه في اللغة العربية..
مدورتش في حياتك العطرة عن الفخامة ولا السيادة ولا العظمة..
كنت البساطة .. كنت الرقة .. كنت الخير والرحمة
بس عارف
انا والله العظيم قلبى مليان حبك ..
بحبك اوى بقد الحب النضيف الراقى الى في الدنيا ..
بس متزعلش مننا ..
ماشى؟
ماتزعلش ..
احنا هانفوق .. عشان حياتنا بقت حياة على ايدك.
انا اسف انى طولت عليك ..
ربنا يكرمنى بلقاك دا كل ما اتمنى.
......
ايهاب جمال
هووووبى
