ركز قبل ما تتكلم

[l-lo0oBy]

عنوان غريب مش كده؟؟

عمرك لقيت إنك مش عارف تتواصل مع حد معين؟؟ رغم إنك فعلا عايز تكلمه؟

لقيت مرة واحد مابتحبّش تتكلم معاه خالص؟؟ كده لله في لله؟؟

هل مرة لقيت إنك مش عارف تبيع سلعتك للزبون بتاعك رغم إنك حاولت بكل إخلاص؟
أكيد أيوه.. مش كده؟

طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل.. والحاجة دي اسمها
(التحدث بإيجابية)

*********

في البداية عايزة أوضح لك حاجة مهمة جدا عن عقلنا اللاواعي
هنعرفها من المثال الصغير ده
:
هاقول لك جملتين عايزاك تركز فيهم قوي وتنفّذ اللي فيهم

ماتفكرش في وردة حمراء

ها ها ها.. ينفع؟ طيب خد دي كده

ماتتخيّلش سيارة سوداء

ها؟ خدت بالك من اللي حصل ده؟؟ أكيد أكيد فكرت لا إراديا في الوردة الحمراء وفي السيارة السوداء كمان

*********

إيه اللي حصل ده؟


اللي حصل يا جماعة إن العقل اللاواعي بتاعنا مابيسمعش الكلام قوي.. ببساطة بياخد الجملة ويقعد يفكر فيها كلمة كلمة عشان يقدر يستوعبها.. فعلشان تفهم الجملتين اللي فاتوا كان لازم العقل اللاواعي بتاعك يتخيل الوردة والسيارة السوداء

يعني إيه؟؟ يعني لو أنا عايزة أأثر على العقل اللاواعي للشخص اللي بتكلم معاه, ومش عايزاه يفكر في وردة حمراء.. يبقى لازم الجملة مايبقاش فيها وردة حمراء.. صح كده؟؟

*********

طبعا المسألة مش مسألة وردة حمراء وسيارة سوداء
عشان تفهم قصدي اقرا الأمثلة دي

البائع: الأسعار بتاعتنا مش غالية.. احنا مش حرامية ونصابين

الجملة دي غلط تماما وهتأثر في اللاشعور بتاع الزبون.. هيلاقي نفسه ببساطة (مش مستريح) للصفقة دي, ومش لازم يكون عارف ليه.. لكن احنا عارفين طبعا

جملة (مش غالية) دي هيركز اللاشعور على كلمة (غالية) لا إراديا.. والجملة التانية (احنا مش حرامية ونصابين) هيفهم منها إنهم (حرامية ونصابين).. ده أكيد

يبقى المفروض البائع يقول مثلا: أسعارنا مناسبة جداً.. احنا يهمنا ثقة العملاء

*********

نفهم من كده إيه؟؟

نفهم إن إنت لو عايز تأثر في اللي قدامك بحاجة, يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض

الطبيب: ماتخافش.. الحقنة مش بتوجع خالص

هه.. إيه رأيك في المثال ده؟؟

يلاّ مع بعض نطلع الكلمات السلبية
:
أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف
ثاني كلمة سلبية هي: (مش بتوجع).. دي هتخليه يتخيل الألم والوجع
يبقى المفروض يقولها ازاي؟؟

الطبيب: اطمئن.. هتحس براحة بعد ثواني

(ملاحظ إننا ماذكرناش كلمة "حقنة" أصلا؟)

*********

خدت بالك؟

ببساطة لأن هي دي الحقيقة, بس المهم هنوصلها له بأي طريقة؟

البنت لخطيبها: ماتقلقش يا حبيبي.. عمري ما هاخونك أو أكرهك

طبعا كلنا حسينا بصدمة من الكلام ده.. لكن احنا عرفنا ليه.. عشان الكلمات السلبية زي: ماتقلقش- هاخونك – أكرهك

المفروض الجملة دي تتقال كده
البنت لخطيبها: اطمئن يا حبيبي.. أنا مخلصة لحبنا وهافضل أحبك على طول

شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى

*********




نستفيد من الكلام ده إيه بقى؟؟

نخش على الحكمة بتاعة النهاردة
مهم جدا معنى الكلام الذي نقوله.. والأهم هو: كيف نقول هذا المعنى

استخدم كلمات إيجابية دائما في حياتك.. ولاحظ الفرق الذي سيحدث في علاقاتك مع الناس..واعرف الحقيقة دي.. الناس اللي بيستخدموا كلمات سلبية كتير في كلامهم, الناس بتبتعد عنهم ومش بتحب تتكلم معاهم.. افتكر حد مش بتحب تتكلم معاه.. يا ترى إيه السبب؟؟ بيشتكي دايما من الظروف؟ بيشتم كتير؟ بيثير الإحباط؟؟ ركز في كلامه هتلاقي الكلمات اللي قلنا عليها.. الكلمات السلبية

على عكس الناس اللي الناس بتحب تتكلم معاهم.. فكر في واحد بتحب تتكلم معاه وبتستمتع بكده.. مبتسم؟ متفائل؟ بيهوّن على الناس اللي حواليه مشاكل الحياة؟ ركز في كلامه هتلاقي الكلمات اللي بنقول عليها: الكلمات الإيجابية

[دمعه الم]

بصراحه يا هوبي الكلام جميل جداً

بس فين الى يعمل بـ الكلام دهـ

ودهـ مش معناهـ ان مفيش حد كدهـ

لأ في بس نادر اما تصادف انسان بـ النوع والشخصيه دى

بجد لو كلنا فهمنا الموضوع والنقطه دي

حاجات كتير هتتغير فينا وفـ اسلوب حياتنا

بس بجد استفدت من الشرح المبسط دهـ

تسلم ايدك هوبي

...

[Ex]

ما شاء الله عليك

يا هوبي مواضيعك دايما متميزة بجدارة

ما شاء الله عليك الموضوع يجنن وكلماتة احلى

لك ارق تحياتي و لا تحرمنا من مواضيعك

[fr3oon10]

موضوع جميل جدا يا هوبى فعلا

بس مين صح اللى يعمل كده


مشكور جدا على الموضوع يا باشا

تحياتى لك

[l-lo0oBy]

مشكوووووووورين

وخلاص اللى ميعملش يبتدى لما يشوف الموضوع يعمل كده
ياريت كلنا نكون كده وأكيد انى وغير ى كتير بيحاولوا

[amirat alard]

merçiiiiiiii beaucoup

[l-lo0oBy]

شكرا لمرورك الجميل

[تملي معاك]

عالم نفس ده ولا ايه
ههههههههه
مشكور ياهوبى على الموضوع
موضوع صح وميه ميه
تحياااااااتى لك
واتمنالك المزيد

[نيروو]

انا ان شاء الله احاول اعمل كده بس اوعى تفتكر ان طريقتى فى الكلام وحشه لاء والله بس عايزاها تتحسن كمان وتسلم على موضوعك

[فارس اليكس]

تسلم يا هوووووووووووووبى على الموضوع

روووعة بجد