طبعا أكيد شفت الماتش النهائي في كأس العالم
ما هو إنت حتى لو ماكنتش مشترك في الـ ايه ار تى ولا حتى مظبط لك وصلة..
الجهود الحكومية الصالحية الكاملية نجحت الحمد لله في إذاعة المباراة على القناة الأرضية -عشان بس ماتقولوش حرمناكم من حاجة
طيب شفت المشهد الغريب اللي قام فيه اللاعب الفرنسي الشهير "زين الدين زيدان" بضرب اللاعب الإيطالي "ماتيراتزي" بدون كرة؟!
شفتها.. اندهشت زينا.. ضربت كف على كف وقلت لنفسك:
"هو إيه اللي بيعمله زيدان ده؟!"
ولما الحكم طرده -وده قرار كروي قانوني مائة بالمائة- انبسطت ولاّ زعلت؟
ممكن تكون انبسطت عشان "زيدان" غلط –مهما كان السبب اللي خلاه يضرب "ماتيراتزي"- وكان لازم العقاب يكون فوري..
وممكن تكون زعلت لأنك شعرت بإن كابتن فرنسا تعرض للاستفزاز من اللاعب الإيطالي فضربه وأنهى حياته الكروية الحافلة بكارت أحمر..
ممكن تكون شعرت بالاعتزاز بتصرف "زيدان" – اللي بتجري في عروقه دماء عربية- لأنه دافع عن نفسه أو عن أسرته –أيا كان- ضد الإهانة، وفي نفس الوقت جايز تكون قلت لنفسك: "يعني هو مش عارف يتحكم في نفسه وفي أعصابه عشان الهدف الأكبر اللي هو كأس العالم؟"
وبخصوص التحكم في الأعصاب والقدرة على تحمل الضغوط...
هحكيلكم حكاية قديمة...
حكاية بطلها واحد عربي برضه اسمه "عنترة بن شداد"
يروى أن أحدهم جاء إليه وسأله عن سر قوته وتحمله للشدائد..
فطلب منه "عنترة" أن يلعب معه لعبة تقوم على التالي أن يضع "عنترة" أحد أصابعه في فم هذا الرجل على أن يفعل ذلك الرجل الأمر ذاته فيضع أحد أصابعه في فم "عنترة"..
ثم يبدأ كل واحد منهما في العض بأقصى ما أوتي من قوة..
طبعا صاحبنا ما كانش فاهم إيه هو الموضوع بالظبط...
يسأل "عنترة" عن سر القوة والتحمل، يقول له: "تعال نعض صوابع بعض"؟!!!
بس إغراء معرفة سر قوة "عنترة" كان كبيرا فقبل الرجل أن يلعب هذه اللعبة العضية!
طبعا بعد فترة قصيرة لم يتحمل الرجل عضة أسنان "عنترة" الحديدية فصرخ طالبا الرحمة فتركه "عنترة" وهو يضحك ثم قال له:
"هذا هو سر قوتي وقدرتي الكبيرة على التحمل.. لو لم تصرخ أنت الآن من الألم لصرخت أنا ولفزت أنت ولكني عزمت ألا أفعل ذلك وأن أتحمل وأصبر على الشدائد حتى أستطيع أن أتجاوزها".
"عرفت سر قوة عنترة يا أستاذنا"؟
تحب تكون زيه بقى ولاّ زي "زيدان"؟!
يعني تحب تكون من الناس اللي بتتحكم في أعصابها في الأوقات الصعبة والحرجة ولاّ إنك تسيب كل حاجة تاخد طريقها وكل انفعالاتك تطلع في وقتها وزي ما تيجي تيجي بقى؟
والله ده له مميزات وده له مميزات..
مميزات "عنترة".. إنه بياخد حقه تالت ومتلت بس ممكن يكون متأخر شوية.
ومميزات "زيدان".. إنه بياخد حقه فوري بس ممكن بعد كده ناس كتير تلوم عليه أسلوبه العنيف العصبي.
عموما التحكم في الأعصاب في الأوقات الحرجة ده صفة من صفات الزعماء وقائدي المجموعات والدول لأنه ممكن في لحظة انفعال طارئة ياخد على أثرها قرار يودي نفسه وبلده في ستين داهية ولا مؤاخذة!
طبعا مش مطلوب منه إنه يكون جبلة وماعندوش دم وبارد!
بس في نفس الوقت مش مطلوب منه إنه يكون نار وولعة ومع أي حد يقول له "بخ" يركب الهوا ويضرب بدراعه يمين وشمال ويخبط في ده ولاّ ده؟
ولاّ إنت رأي سيادتك إيه؟
رأيك في إن كابتن الفريق والمسئولين الكبار ورؤساء الدول يكونوا زي "عنترة" ولاّ زي "زيدان"؟
إنت نفسك..
كنت كام مرة "عنترة" وكام مرة "زيدان"؟
وإيه النتيجة اللي ترتبت على سلوكك ده بعد ما قمت بيه؟
يعني لما تعاملت مع الأمر المستفز بهدوء وحكمة
كانت إيه النتيجة ولما تعاملت معاه بأسلوب عصبي ماذا كانت النتيجة؟
كام مرة اتحملت العضة وإنت اللي انتصرت في الآخر،
وكام مرة ماقدرتش تتحمل وجع العضة وصرخت بأعلى صوتك؟
عضة عنتــره .. ولا راس زيدان ؟؟
العرض العادي
