غسيل الشعر
شوفي يا ستي ياريت إن عدد مرات غسيل شعرك في الصيف ما تزيدش عن مرتين، طبعا أنت دلوقتي هتقولي ازاي.. ده أنا كل شوية بادخل الحمام وآخد دش...
هاقول لك مفيش مشكلة إنك تاخدي دش بس ياريت إنك تحطي بونيه على شعرك؛ وده لأن كتر غسيل الشعر على الفاضي والمليان بيخلي الشعر يفقد لمعانه وحيويته، وكمان ممكن إنه يتعرض للتقصف.
وخدي بالك كمان من الميه اللي بتغسلي بيها شعرك إنها ماتكونش ميّه سخنة قووي، أو ميّه بادرة قوووي، يعني من الآخر اغسليه بميّه فاترة، وده علشان تحافظي على لمعانه.
النصيحة التانية
استخدمي الشامبو والبلسم المناسبين لنوع شعرك
ودي حاجة مهمة قوووي لازم تاخدي بالك منها وهي إنك تستخدمي الشامبو والبلسم المناسبين لنوع شعرك...
يعني مثلا لو كان شعرك دهني يبقى استخدمي الشامبو اللي بيكون مكتوب عليه خاص للشعر الدهني.
وياريت إنك تخففي الشامبو بشوية ميّه قبل ما تحطيه على شعرك واوعي تنسي تشطفي شعرك كويس وتخلصيه تمامًا من أي آثار للشامبو أو البلسم.
النصيحة التالتة
استخدمي الزيوت المغذية لشعرك
لو عايزة تحافظي على لمعان وحيوية شعرك في الصيف يبقى ياريت تستعملي الزيوت الطبيعية المغذية للشعر زي "زيت جوز الهند وزيت الزيتون" وده لأن الزيوت دي بتساعد على الحفاظ على الشعر، خاصة لو كان الشعر ده جاف.
وكمان ياريت إنك تعملي حمام زيت لشعرك وليكن حتى مرة في الأسبوع لأن ده بيعوض الشعر عن الدهون اللي بيفقدها نتيجة العرق...
ودي طريقة عمل حمام الزيت
* قسمي شعرك لأربعة أجزاء.
* حطي الزيت على فروة رأسك ولغاية أطراف شعرك، خلي كل قسم لوحـده حتى نهاية الرأس.
* اعملي مساج خفيف لفروة الرأس علشان تتأكدي من وصول الزيت لجميع أجزاء أم الشعر
* غطي شعرك ببونيه الشعر لمدة عشرين دقيقة.
* اغسلي شعرك بالمية الفاترة وبعد كده بشامبو وبلسم مناسب لنوع شعرك.
النصيحة الرابعة
ابعدي عن الصبغة ومجفف الشعر
ايه رأيك لما تخلي الصيف فرصة إن شعرك يكون طبيعي وتستغني فيه عن مجفف الشعر والصبغات نهائيا في فصل الصيف، ود لأنها مضرة جدا جدا على الشعر، وكمان مش هتقعد كتير في شعرك نتيجة زيادة كمية العرق.
النصحية الخامسة
ابعدي شعرك عن المية المالحة
ياريت إنك تلبسي بونيه للشعر وأنتِ نازلة البحر، وده علشان تبعدي شعرك عن الميّه المالحة اللي بتضر الشعر .
النصحية السادسة
هوّي شعرك
ياريت إنك تهوّي شعرك باستمرار وأنتِ في البيت وبلاش موضوع إنك تعمليه "كحكة" باستمرار، يعني افرديه شوية اعمليه ضفيرة شوية، اعمليه ديل حصان شوية، يعني من الآخر دلّعيه وبلاش تحبسيه.
كمان لو كنتِ محجبة بلاش إنك تلبسي الحجاب وشعرك مبلول، استني لما ينشف وبعد كده البسي الحجاب.
النصيحة السابعة
اعملي مساج لجلدة الراس
وأنتِ قاعدة في البيت ياريت إنك تعملي مساج لجلد رأسك عن طريق استخدام أطراف صوابعك في عمل تدليك لفروة الرأس....
وعلى فكرة الموضوع ده بيحافظ على سلامة جلدة الرأس لأنه بيزيد من تدفق الدم عبر الأنسجة مما يؤدي إلى وصول كمية أكبر من الغذاء والأكسجين إلى الشعر، كما يساعد على التخفيض من حدة التوتر في جلدة الرأس اللي بتسبب تساقط الشعر.
النصيحة الثامنة
اهتمي بنوعية غذائك
في بنات كتير بتفتكر إن الشعر بيتغذى من الخارج بالشامبوهات والكريمات والزيوت وده طبعا مش صحيح لأن الشعر بيستمد غذاءه من الجسم نفسه....
علشان كده ياريت إنك تكتري من أكل الخضروات الطازجة والفاكهة الطازجة وابعدي عن التيك أواى والمعلبات لأنها مش بتفيد.
بس كده..
دي كانت شوية نصائح..
هي صحيح بسيطة بس مفيدة جدا جدا جدا
وتعالي نشوف مع بعض دلوقت مجموعة
من الوصفات الطبيعية المفيدة للشعر..
وصفة لعلاج تساقط الشعر
المكونات:
• بيضة.
• ملعقة كبيرة عسل.
• خلطة زيوت عبارة عن: "زيت الزيتون وزيت جوز الهند وزيت الصبار".
• ريحان مجفف.
• ملعقة كبيرة مايونيز "دي في حالة لو كان شعرك جاف".
الطريقة :
اخلطي كل المكونات دي مع بعضها البعض وحطّيها على شعرك لمدة ساعتين، كرري الوصفة دي مرتين في الأسبوع وهتشوفي الفرق بنفسك....
وصفة لتلميع وتنعيم الشعر
المكونات:
• ملعقة عسل.
• علبة زبادي.
• ملعقة مايونيز "موجود في السوبر ماركت".
الطريقة:
اخلطي المكونات دي كلها مع بعضها وحطيها على شعرك لمدة ساعة وبعد كده اغسلي شعرك بالشامبو والبلسم، كرري الوصفة دي مرتين في الأسبوع.
وصفة لزيادة كثافة الشعر
المكونات :
• صفار بيضة.
• 3ملاعق زيت الخروع.
الطريقة :
اخلطي المكونات دي كلها مع بعضها وحطيها على شعرك وحطي عليها فوطة مبلولة بماء دافئ لمدة ساعتين، كرري الوصفة دي مرة كل أسبوع وهتشوفي الفرق بنفسك.
وصفة لتقوية الشعر
لو كنتِ حاسّة إن شعرك ضعيف ومحتاج تقوية يبقى جرّبي الوصفة دي.
الطريقة:
اخلطي كل المكونات اللي فاتت مع بعضها وحطيها على شعرك لمدة ساعتين على الأقل، بعد كده اغسلي شعرك بالميّه الفاترة.. كرري الموضوع ده مرتين في الأسبوع.
وصفة لعلاج جفاف الشعر
مشكلة جفاف الشعر دي مشكلة بتعاني منها بنات كتير قوووي علشان كده جبت الوصفة دي اللي هتساعدهم على علاج المشكلة دي نهائيا.
المكونات :
• بيضتان.
• بونيه.
الطريقة:
اخفقي البيضتين وبللي جذور شعرك بالبيض بواسطة قطنة أو فرشاةوبعد كده وزّعي البيض على باقي شعرك.
بعد كده دلِّكي شعرك بعمل مساج لكامل فروة الرأس. ثم ارفعي شعرك كله إلى أعلى الرأس وغطي شعرك ببونيه لمدة ساعة.
بعد الساعة فكّي البونيه وسيبي شعرك لغاية ما ينشف، بعد كده اغسليه بالشامبو والبلسم المناسبين لنوع شعرك، كرري الوصفة دي مرة كل أسبوع.
وصفة للشعر المتقصف
لو كانت أطراف شعرك مقصفة يبقى ياريت إنك تقصي الأطراف المقصفة دي وبعد كده تعملي الوصفة البسيطة دي.
المكونات:
• بيضتان.
• ملعقتان من زيت الجرجير.
• بونيه.
الطريقة :
اخفقي البيضتين وضيفي إليهما ملعقتين من زيت الجرجير وقلبيهم مع بعض كويس، بعد كده بللي جذور شعرك بالخليط، ودلكي شعرك بباقي الخليط، اعملي المساج لشعرك لمدة 5 دقائق بعد كده ارفعي شعرك كله إلى أعلى الرأس وغطي شعرك ببونيه لمدة ساعة.
بعد الساعة فكي البونيه وسيبي شعرك لغاية ما ينشف بعد كده اغسليه بالشامبو والبلسم المناسبين لنوع شعرك، كرري الوصفة دي مرة كل أسبوع.
وصفة لإعادة إنبات الشعر
والوصفة دي مخصوص لكل البنات اللي بتعاني من مشكلة عدم إنبات الشعر من الأمام ومكوناتها بسيطة جدا.
المكونات:
• حزمة جرجير.
• نصف كوب ميه.
الطريقة:
خذي حزمة الجرجير وضعيها في الخلاط مع كوب ماء, ثم ضعي عصير الجرجير على رأسك واحرصي على أن يلامس فروة رأسك لأن تأثيره يكون في إنبات الشعر وتقوية البصيلات الضعيفة.
كرري هذه العملية مرتين في الأسبوع لمدة شهر وهتلاقي نتيجة هايلة جدا.
وصفة للتخلص من قشر الشعر
دي بقى أحسن وصفة للتخلص النهائي من قشر الشعر
المكونات:
• كوباية كبيرة خل تفاح "موجود في السوبر ماركت".
الطريقة:
كل اللي عليكِ إنك تجيبي كوباية خل التفاح ودفّيها عن طريق إنك تضعي الكوباية دي في ميّه سخنة، وبعد كده تشطفي شعرك بيها واتركيه لمدة ساعة على شعرك، وبعد كده اشطفي شعرك بالماء الدافئ، كرري العملية دي مرة كل أسبوع.
وصفة لتطويل الشعر
واللي بتشتكي من إن شعرها مش بيطول تعمل الوصفة دي..
الطريقة:
اخلطي المكونات دي كلها مع بعضها وبعد كده حطيهم على شعرك لمدة ثلاث أو أربع ساعات، وغطي شعرك ببونيه... بعد مرور 3 ساعات اغسلي شعرك بالشامبو والبلسم المناسبين، كررري الموضوع ده مرتين في الأسبوع لمدة شهر وإن شاء الله هتلاقي نتيجة هايلة.
وصفة لتغذية الشعر
دي كمان وصفة لتغذية الشعر
المكونات:
• نصف فنجان زيت ذرة.
• نصف فنجان زيت جوز الهند.
• نصف فنجان بلسم.
• عصير نصف ليمونة.
• ملعقة كبيرة عسل نحل.
• ملعقة كبيرة زبادي.
• ملعقة كبيرة خل.
الطريقة:
اخلطي كل المكونات دي مع بعضها وحطي الخليط ده على شعرك، مع عمل تدليك لفروة الرأس وده لأنه مفيد جدا للشعر، فهو يساعد على النمو السريع والصحي وينشط الدورة الدموية ويسهل وصول الأكسجين إلى الشعر.
بعد كده غطي شعرك ببونيه لمدة 4ساعات أو أكثر ثم اغسلي شعرك بالماء الفاتر، كرري الموضوع ده مرة كل أسبوع وإن شاء الله تلاقي نتيجة هايلة.
وصفة للتخلص من تموجات الشعر
المكونات:
• صفار بيضة واحدة.
• نصف ملعقة زيت زيتون.
• كوب إلا ربع من الماء الفاتر.
الطريقة:
خذي صفار البيضة وضيفي إليه نصف ملعقة زيت الزيتون بالقطارة تدريجيا مع التقليب المستمر، وبعد كده ضيفي الميّه تدريجيا، واستمري في الخفق، وبعدين حطي الخليط ده في زجاجة، وبعد غسل شعرك بالشامبو دلّكي شعرك بالملطف ده وسيبيه على شعرك شوية لمدة ربع ساعة بعد كده اشطفي شعرك.
التوقيع - ملامح قمر
۞
قلوب المؤمنين مش ممكن تنكسر
والطفل الباكي ال*زين
مسيره ينتصر
شارك 
العرض العادي
