هل تنساق وراء مثل هذه الظواهر
ظاهرة غريبة ومنتشرة جدا وعلشان كدا عاوزة رايكو فيها دى مشكلة من مشاكلنا وانا عاوزة اجمع الاراء لعلنا كلنا نستفيد ونفيد اصحاب العقول الى بتنساق وراء هذه الظــــــــــــــــــــــ واهــــــــــــــــــــــ ــــــــــــــر
الفضفض فون".. "ياختي فون".. "الإيمان الصوتي"..
جربت تتصل؟! _ _ _ _ _ _ _ _ _ _ _ _ _ _ _ _ _ _ _ _ _ _ _ _ افتح التليفزيون واتفرج.. بس ممكن تتصل؟ _ _ _ _ _ _ _ _ _ _ _ _ _ _ _ _ _ _ _ _ _ _ _ _"حاسس إنك لوحدك؟ حزين ومكتئب وجواك شعور بإن الحياة لونها إسود مخطط بكحلي متلون برمادي؟ بتسمع كتير أغنية "عيد ميلاد جرحي أنا"؟ بتشتري شمع ملون وتولعه يوم عيد ميلاد جرحك إنت وبعدين تقف تغني -مع الديابة الوحدانية- "الأيام الحلوة بتعدي في ثواني"؟ عرفت "سوسن" وقالت لك إنها بتموت فيك وبعدين شفتها بعينيك -اللي أكلهم الدود- وهي خارجة حاطّة إيدها في جيب "سيد" صاحبك من جنينة الأورمان الساعة 6 بالليل رغم إنها بتقفل الساعة 5 -"الأورمان" مش "سوسن"!-.. والدك بيبص لك بصة بتحسسك بإنك "هريدي" ولد عمه اللي في الصعيد اللي هيطخه عيارين عشان ياخد بتاره؟.. والدتك دايما بتحط "ورك الفرخة" لأخوك الصغير رغم إنها عارفة إنك مش بتاكل حاجة في الفرخة إلا وركها؟ نفسك تركب أسانسير في بيتكم -اللي هو دورين بس- عشان تركبه مرة فيحصل فيه عطل فيقع بيك فتيجي لك كسور مضاعفة وتروح المستشفى فترتاح من كل الناس الوحشة دول؟ ماتترددش.. اتصل بينا على خط "الفضفض فون" على رقم ".........." هنسمعك وهندلعك وهنشخلعك وهنحميك وهنلبسك وهنكسيك وهنطلعك زي الفل كأنك جوزين حمام بالفريك.. اتصل دلوقتي وفضفض معانا هتلاقينا كلنا بنسمعك.. اتصل بينا على "........" نقول كمان الرقم "........." نعيد كمان الرقم "............" نزيد كمان الرقم "........." ممكن تسمع لنا الرقم "......."!
_ _ _ _ _ _ _ _ _ _ _ _ _ _ _ _ _ _ _ _ _ _ _ _
"لو كنت بتدوري على أقصر الطرق إلى شباب الجامعة، ونفسك تعرفي أسهل الطرق لقلب "هاني" و"تامر" و"لؤي" و"ياسر" و"رامي" و"حاتم" -اتصلي بينا على ".........".. لو كنت بتشعري بالحقد والغل والحسد تجاه صاحبتك "نورا" الجميلة الأمورة الحلوة ونفسك تعرفي طريقة تخليكِ زي القمر وأحلى منها مية مرة اتصلي بينا على "........".. لو شفتِ نفسك في المراية فحسيتِ بإنك بتتفرجي على فيلم رعب، ولو مشيتِ في شارع جامعة الدول العربية، فمافيش أي عربية وقفت لك، ولو ركبتِ أتوبيس زحمة فمافيش أي بني آدم طلع عنده ذوق قام وقعدك مكانه، اتصلي بينا على "..........".. لو جربتِ كل أنواع الشامبو المستورد والمحلي، واستخدمتِ كل أنواع الزيوت من أول زيت "شل" لغاية زيت "التعاون" وفضل شعرك زي ما هو أنشف من الليفة وهي على الشجر وأخشن من الحجر وهو لسه على الجبل، اتصلي بينا على "........" خط "ياختي فون" للماكياج والجمال والموضة.. "ياختي فون".. هيروشك وهيأيفك وهيخليكِ أحلى بنات الكون وأرق من كل الكائنات البرمائية والزاحفة.. اتصلي الآن.. "مع ياختي فون.. هتخلي كل الشباب مجنون"!
_ _ _ _ _ _ _ _ _ _ _ _ _ _ _ _ _ _ _ _ _ _ _ _
"أخي الفاضل.. ندرك مصاعب ومشاغل الحياة التي تعاني منها.. وندرك -أخي الفاضل- أنك بكل تأكيد -أخي الفاضل- لديك الكثير من التساؤلات التي لا تستطيع -أخي الفاضل- أن تبوح بها لأحد خوفا -أخي الفاضل- من أن يمثل هذا لك -أخي الفاضل- حرجا أو يثير حولك -أخي الفاضل- بعض من التساؤلات -اللي كده أو كده- أخي الفاضل.. اتصل بينا على "..........." ونحن في خط "الإيمان الصوتي" سنكون إلى جوارك -الجيم تنطق معطشة كما ينطقها أهل الخليج- وسنجيب عن كل أسئلتك -أخي الفاضل- الإيمانية، وسيتواصل معك -أخي الفاضل- نخبة من ألمع العلماء والشيوخ الذين يسهرون من أجل راحتك -أخي الفاضل- ويسعون دوما إلى معرفة كل ما هو جديد في عالم الفتوى حتى يقدمون لك -أخي الفاضل- آراء وفتوى تتماشى مع صحيح الدين.. معنا في "خط الإيمان الصوتي".. أنت في القلب.. بس اتصل الأول على "..........."!
_ _ _ _ _ _ _ _ _ _ _ _ _ _ _ _ _ _ _ _ _ _ _ _ لو لاحظت هتلاقي إن الإعلانات دي اللي بتقدم خدمة مدفوعة الثمن مقدما عبر الاتصال التليفوني بتركز على ثلاثة خطوط أساسية...
"المشاكل العاطفية- الموضة والماكياج- الاستفسارات الدينية"..
وده معناه أن الخطوط الثلاثة دول هم بالفعل أكثر الأشياء التي تشغل بال الشباب اللي هم عادة بيكونوا مستهدفين من الإعلانات دي..
الشباب.. حضرتك يعني!
والسؤال المحوري الجوهري هنا:
هل تثق في الخدمات والنصائح التي تقدم عبر خدمة تليفونية مدفوعة الثمن؟
ويا ترى جربتها مرة أو مرتين أو عشرة قبل كده؟ وكانت النتيجة إيه؟
ممكن تكتب لنا إجابة حلوة كده تحت من غير ما تتصل على أي رقم تليفون.....!؟
ياريت الكل يشارك دى مشكلتنا دلوقتى كتير من قنوات التليفزيون مخصصة للمسابقات علشان تكسب الاف الدولارات وكتير علشان المشاكل الصحية والنفسية والجمال والموضه والدين وكتير وكتير وبعدين حانعمل اية فى كل دا
تحياتى لجميع
بصراحه موضوع منتشر جداااااا وغريب اوى ويعنى خلاص مفيش غيرهم هما اللى هيحلولنا مشاكلنا بجد بستغرب جدا على الاعلانات دى كله هبل فهبل وكمان اللى بيقولك عرفينا اسم اللى بتحبيه ونقولك بيحبك ولا لا وبيحبك اد ايه والله عبط على الاخر وناس فاضيه وفلوس وبيلهموها على الفاضى وخلاص وبيستغلو الشباب اللى مش لاقى حاجه يعملها وطبعا ولا بيوصلوك لحلول ولا حاجه اهو شويه رغى يفضلو يرغوهم مع الناس وخلاص ولا حاجه بتتحل ولا بتاع تسلمى رحاب على موضوعك وبجد ياريت الناس تكون اعقل من كده بكتير ومش يعبروهم هههههههههههههه ومتتاخريش عننا تانى
موضوع جامد يا رحاب ومنتشر فعلا بس بصراحه أنا عمرى ما جربته ولا هجربه دى أكيد ناس فاضيه او معاها فلوس مش عارفه توديها فين الموضوع ده فعلا بقى مستفز جدااااا كل حاجه اتصل كل مشاكل الدنيا بقى ليها رقم تليفون وطبعا فى ناس بتنساق ورا المسابقات دى على العموم هى فعلا ظاهرة مستفزه ومعتقدش انها هتنتهى لأنها بتزيد يوم بعد يوم .... موضوع جامد مشكوره عليه يا قمر
لا كله كوم وخط اللى هيوظفوا الشباب كوم تانى يعنى لما الشاب مش بيشتغل هيجب منين فلوس عشان يتكلم جايز يحنوه عليه ويشغلوه عامل بجد استغلال لظروف الشباب لو فعلا الناس دى غرضها تخدم الشباب كانت هتعمل الخدمات دى مجانيه لكن طبعا الدقيقه بجنيه ونص وهيذلوك على بال ما يردوا
بجد موضوع هاااااايل جدا
وبعدين اللى بيحل المشاكل دى مش اخصائى تجميل ولا رجل دين معروف ولا وزير القوه العامله
بالعكس ممكن اللى بتحل المشاكل العاطفيه تكون هى متطلقه متخانقه مع جوزها
اما اللى بتسمع مشاكل البنات وتقولها تعمل ايه اكيد مش تعرف حاجه لانها مش خريجه خدمه اجتماعيه ولا ادب _علم نفس_ وحتى لو كده يقى بتقدير عام مفبول دور تانى او تالت
اما بقى الكارثه والمصيبه الكبرى رجال الدين اللى كل يوم نشفهم فى الفضائيات_ بعضهم _واللى بيقولو فتاوى غريبه جدا وربنا يحفظنا لاننا بقينا فى زمن بنصدق الكداب ونعمل منه مثل اعلى_ونكدب الصادق ونعمل منه بعبع
تسلم ايدك رحاب على الموضوع الجاامد مووووت
التوقيع - m3_soliman
لات*سبو رقصى بينكم طربا
فالطير يرقص مذبو*ا من الالم
والله انا برضه ببقى مستغرب
لما ألاقى برنامج مثلا تافه ملوش لزمه
وألاقى حد بيتصل
وقاعد يشكر فى الضيف أو المقدم
ومش عارف يقول كلمتين على بعض
وبعدين يقفل
طب ايه لزمتها بقى
دى غير بقى كل شويه اتصل من أى تليفون
عشان تكسب
ههههههههههه
كنت متوقعه مليون الميه أنى راح الاقى شباب واعى وفاهم لكل الظواهر السلبيه ال بتحصل لاسف فى بلادنا وكنت على يقين انى راح الاقى ردود ترفض هذه الانواع من السلبيه
موضوعك جميل جدا يارحاب وفعلا دى ظاهره منتشره وكتير اوووووووى وفى كل حاجه ومش عارفه الناس ازاى ممكن تصدق الكلام ده المفروض يعنى ان الشباب يكونوا اعقل من كده ويكونوا فاهمين كويس ان كل ده مش لمصلحتك اكيد ده هما بيكسبوا من وراه عشان كده عملوه يعنى مش هاتهمهم مصلحتك اكتر من مصلحتهم يارب الناس تعقل وتعرف ان كل ده هبل فهبل والله هبل
العرض العادي
