لو ألقاك بجد ؟
لو أبقا الحقيقة اللي مش خاينه حد
وكتف النسيم اللي مسنود في لحظة ميلادك
بورد
لو أبقا اختيارك ....
وطيبة رجوعك مع الليل لدارك
واكون المؤكد
واكون احتمالك
تشوفني تسمي عليه بخيالك
وتبقالي" يمكن "
وتبقالي وعد !!
شبابك يعديلي صعبي وسهلي
ويوصل تملي
ويحيلي أرض ....
تنور على وش كل الحاجات اللي مشتاقة أعيشها
ومش لاقيه غد !!!
لو ألقاك بجد
وتبقى انتصاري
لو الدينا شالت في قلبك مصيري !!
وحلَّت مراري
أكون طعم سكر في شاي العصاري
وسيرتك إذا يوم بقيت الحكاوي
وسحرك
وحاوي
وسكة وصولك بكل الخطاوي
"وسينةْ " سؤالك
وجيم كل رد
وغيرة جنابك
وسطوة جنانك
وحدّك إذا احتجت جواك لحد !!
لو ألقاك بجد
وأكون احتلالك
وأهلك
وسرك
وحلك
وحالك
ودقة شمالك
وتكشيرة غامقة تنعكش جمالك
وضحكاية رايقة تكون مقسومالك
في كل اللي فاتك
وصارك
وبعد
وأول وتاني وعاشر ....
لحد
ما يخلص كلامي
أو ألقاك بجد !!!
كلمات منقووووووووووووووووله
وعجبانى اوووووووووووووووووى
لو القاك بجد
شارك 
