حوار مع شاب روش بس ايه طحن.....

[die_hard]

- بص بقى احنا لازم نعيش حياتنا ... آه زى الشباب بتاع امريكا كده .. وزى الفيلم اللى شفناه امبارح .. شفت الواد كان معلق كام مزة ... والا العربية اللى راكبها .. والا الموبايل اللى ماسكه ... دى الناس اللى عايشة يامان

- طب ح نعمل ايه ؟

- اضرب شعرك جيل زى تامر حسنى .. وانا ح اعمل سبايك زى بتاع عمرو دياب .. وجزمة كعب كباية .. وحتة سلسلة جنزير محترمة .. وانسيال جلد

- واشمعنى يعنى جلد ما تخليه دهب زى السلسلة ؟

- افهم يا حمار دى موضة .. خليك روش وحديث ومتفتح كده ع العالم الخارجى .. انسيال جلد زى اللى لابسه ريكى مارتن فى الاغنية .. ركز بقى معايا .. بقولك ايه .. ولع الدبوس التانى خلينا نعرف نتكتك

- ماشى

- بيس يا مان ؟

- بيس يا مان .. بس مش الحاجات دى محتاجة فلوس برضه .. والا انا بيتهيأ لى

- سهلة يا مان .. مافيش اسهل من سرقة الموبايلات اليومين دول .. واهى الناس ماشية تايهة.. واى حد سهل تغفله

- آه فكرة

- بعد بقى ما نظبط المسائل .. ننزل بقى نتدنجل .. ونعلق مزز .. او نروش فى اى صالة ديسكو .. ونعيش يا معلم

- ميه ميه ياريس .. بس انا برضه اتكسف امشى فى الشارع وانا عامل فى نفسى الحاجات دى

- يا بنى آدم افهم .. انت ح تفضل طول عمرك متاخر كده .. ده اسمه نيو لوك يا مغفل .. وبعدين ما تنساش تبقى تميع وسطك شوية فى البيت مع نفسك على انغام روبى و هيفا ... علشان تبقى شب روش طحن .. هما البنات بيحبوا كده .. اسمع كلامى وسيبك من الواد احمد ده اللى ح ببوظلك دماغك .. صلاة ايه وصيام ايه وتعذيب ايه .. وده حرام وده حلال .. وسوريا وفلسطين والعراق

- الا صحيح اليهود بقالهم 54 سنة فى فلسطين ؟

- يا عم احنا مالنا اياكش يولعوا ف بعض .. يابا خلينا نعيش حياتنا .. والا انتا عايز تخش المعتقل؟

- اخش المعتقل ليه ؟

- هو كده .. ح تمشى ف سكة الدين والسياسة .. وتقعد تقولى ده صح وده غلط ... ح تبقى أخرتك فى المعتقل .. ح تبقى روش طحن .. ودماغك انضف م الصينى بعد غسيله .. ح تبقى حبيب الكل يا سافو .. اشرب .. انسى .. ما تفكرش ..ما تحلمش .. ما تحسش .. قضى يومك خليه يعدى .. والعمر كله يعدى

.................................................. .................................................. ..........

قال مهاب وهو يناول شريف عصاه ويساعده على القيام من على كرسيه
فى المستشفى :

فاكر يا شريف الايام دى ؟

يااااااااااه .. انت لشه فاكر ياراجل .. دى حاجة بقالها اكتر من 35 شنة



منقول عن


محمود زيدان

[die_hard]

ايه رأيكم ممكن اعرف رأيكم فى الحوار؟

[sayed_554]

حوار جميل وفعلا ده اللى بيحصل الايام دى مع كل الشباب
ويارب اهدى كل المسلمين واسترها معانا جميعا اللهم امين