امتا نتخرج بقى ... د احنا اتصرف علينا كتير اوى.... واحنا سهرنا الليالى وكنا بنذاكر لحد ما نظرنا قرب يروح ....
واللى شهادات وتعليم عالى .... وده تقديره امتياز ،، وجيد جدا وكلام كتير من دهـ
طبعا كل واحد او معظمنا يقول امتا اخلص دراسه وامتا اتخرج واشوف حالى ....
وبمجرد ما يتذكر اخواته الحلوين اللى قاعدين ومستنين فرج الحكومه عليه وعلى ما تفرج بيحس انه كابوس
والمهم انك تبقى مجهز ورقك وتقول هروح اقدم فى كذا شركه واشوف حظى هيويدنى فين طبعا ما بتسمعش شهادتى ولا تقديرى هيودينى فين لان الكلام ده ما بيحصلش
وفى الاخر انت وحظك فعلا يا اما تشتغل شغلانه تفخر بيها يا اما تشتغل شغلانه يطلع عينك فيها وتتكسف تقول بتشتغل ايه
تسمع ان فلان متخرج بقاله 5 سنين وقاعد زى ست البيت بالظبط
وفلان شغال فى شركه ايه بس مش بشهادته
قولولى احنا بنتعلم ليه تعليم عالى
لما يكون دكتور ومش لاقى شغل واذا لقى مرتبه ما يكملش معاه لاخر الشهر
يعنى غير صالح للزواج ولا يقدر يفتح بيت
ولا المهندس اللى بياخد شهادته ويقعد بيها ف البيت ولا اللى بيشتغل بيها ف البلديه (يعنى زبال )
كل العينات اللى ذكرتها دى وبتعانى من الشغل واماكن العمل انا شوفتها بعينى
طبعا كله كوم والواسطه دى كوم تانى يعنى عندك واسطه تشتغل مش عندك خليك ف البيت قشر بصل اكرملك
طبعا حلم كل واحد يخلص ويسافر مفيش حد بيحلم يعيش فى بلده اللى هى مصر لانها مش موفره فرص عمل لحد ولا حد يقدر يحقق حلمه هنا الا القليل
واللى بيعمل مشروع بقى ده حكايه لوحده
الحكومه مش بتسيبه ف حاله اول حاجه فين الترخيص وضرايب وحاجات مالهاش اول من اخر
وممكن يكون لسه المشروع ما كملش الاسبوع وتلاقى المصايب نازله ترف عليه
وهو وحظه برده يا اما مشروعه ينجح يا اما يفشل
معظم الجيل حاسس باليأس وده سبب رئيسى فى نسبه العنوسه والشباب اللى يعدى عمره 30 سنه و مش لاقى يتجوز
وربنا يفرجها عليهم
وبما اننا شعب مسالم جدا ولأبعد الحدود فكل مدى ونلاقى نفسنا بنرجع لورا ومفيش اى حاجه بتقدمنا لامام ولا بتساعدنا لحل المشكله الكبيره دى وصوحنا بصوت عالى ومحدش سامعنا وكأنك بتصرخ تحت المياه
وبندعى ربنا يعدلهالنا والحكومه تنفذ وعودها اللى بقالهم اكتر من 15 سنه بيقولوا انتخبو فلان وهو يعملكو اللى ما اتعملش فى الدول المتقدمه وننتظر ... ونتتظر... وطال الانتظار وما شفناش لسه حاجه
وحالنا ده يرضى مين بس
يرضى مين ده يا ناس
أحبكم فى الله 