النهاردة
هاتكلم على رحلة العذاب والضنى
(( الزواج سابقا ))
ونبداء ونقول
فى بلاد بنقول ليها عادات غريبه فى الجواز... طيب واحنا مابصناش لنفسنا ليه ؟؟؟
تعالوا كدة نلقى نظرة على عادتنا وتقاليدنا هنلاقى إن
احنا بقى ولله الحمد عادتنا مكلكعه وكل كولكعه معها عقدة وشنيطة والشنيطة مجموتة (( بالصعيدى )) ... ههههههههه
... وخلاص بقيت روتين يعنى العادى والطبيعى
طيب ما تيجوا نحاول نفهم كل كولكعه منهم كدة ونفصصهم
الكولكعه الاولى
" الشبكه "
مفروض انها عباره عن هديه(( رمزيه )) من العريس للعروسه ... تقوم خالتى (( رمزيه )) دى يوصل سعرها ل 10000 جنية واحيانا اكتر بكتير ...
تفتكر لو عيد ميلادك هتنزل تخنق على اللى بتحبه وتقوله هاتلى هديه ما يقلش تمنها عن كذا ويكون شكلها كذا ,ولو مجيتش الهديه بالموصفات ديه تبقى يا داهيه دقى ,ويبقى نهار الوان على العريس خصوصا اللون الازرق حولين العين والاحمر فى الخدين
الكولكعه التانيه
" المهر "
مفروض برضه انه حاجه رمزيه ...ورسولنا الكريم صلى الله علية وسلم قال (( اقلكن مهورا اكثركن بركه ))
لا ازاى لازم المهر يبقى يساوى تقل العروسه ... كأن العريس ده رايح يشترى علبه سمنة مش انسانه تشاركه حياته ...
وايا كانت حاله العريس لازم يلبى اللى يساوى من وجهه نظر العروسه واهلها قيمتها مع ان الموضوع مش كده
يعنى مثلا لو واحد عنده 5 مليون جنيه وادى العروسه مهر نص مليون جنيه ولو واحد معاه 5000 جنيه ادى للعروسه 500جنيه يبقى اى واحد منهم قدرها اكتر ؟؟؟
الكولكعه التالته
" مؤخر الصداق , قائمه العفش "
نيجى عند الكولكعه دى والكل يقول وقف عندك دى اهم حاجه ... ده يضمن لبنتى او لاختى او للعروسه نفسها حقها يعنى ما يخدهاش لحم ويرميها عضم وفشه وكلاوى ولازم يفكر الف مره قبل ما يطلقها ...
وياترى مين بقى العروسه اللى هتقبل ان جوزها يستمر معاها بس عشان مش قادر يدفع المؤخر ؟؟؟
لا وايه ممكن يكون العريس ده ايده تقيله حبتين يصبحها بعلقه ويمسيها بواحدة وتبقى حياتها كلها الوان اشى ازرق واشى احمر واخضر وعلى كل لون يا طماطم لحد ما تقول حقى برقبتى وتتنازل عن كل حاجه...
ياترى بقى الفلوس ضمنت ايه هنا ؟؟؟
الكولكعه الرابعه
" فرش الشقه "
عايز تتفرج على الكوميديا السودا المنيله بنيله شوفها فى العفش لما العريس والعروسه واهلهم يضربوا بعض بكل ما ثقل وزنه عشان العروسه مش عايزه تجيب الخلاط زى ما هما اتقفوا وعايزاه تدبس العريس فيه او العكس
وساعات كتير الجوزات بتتفشكل بسبب خلاط او سجاده واحيانا نجفه ...
(( وانا والله شخصيا سمعت من ناس قريبة منى عن جوازة كانت هاتتفركش بسبب النجف ))
انا قولت اجيبهولهم على حسابى هدية منى ليهم ولا يفركشوش الجوازة عشان شوية نجف لا راحوا ولا جم
مع ان العروسه مش هتجز لشقه ابن الجيران ولا العريس هيجز لشقه اخت مرات ابوه دا بيته وبيتها والطبيعى ان اى انسان طبيعى بيبقى نفسه بيته يبقى احسن بيت ...
لكن من الواضح ان الخلاط والنجف اهم ...
الكولكعه الخامسه
"الشقه "
لازم تكون خمس ست اوض وشرحه وبرحه يجرى فيها الخيل ...
مع ان اللى هيعيشوا فيها شخصين بس
واذا مش هنتكلم على المساحه يبقى اكيد الاعتراض هيكون على الموقع لازم تكون شقه بحرى ...
انت عايز البنت تفطس من الحر والرطوبه ولا اية ؟؟؟
مع ان شخصين يكفيهم اوضه وصاله لبدايه حياتهم وكمان مش لازم تمليك ماله الايجار يعنى كخه ولا كخه ؟؟؟
دى مجرد بدايه مش اكتر
الكولكعه السادسه
"الفرح "
ممكن كل الكلكيع اللى فاتت يبقى سهل حلها الا دى
لان اهل العروسه لازم يتفشخروا ادام البشر ...
حماه العريس : بص بقى انا لازم فرح بنتى يبقى احسن من فرح بنت ام احمد لمونة جراتنا ولا عايز الناس تقول اننا رمينا البنت ...
ويهديكى يا طنط ,يرضيك يا طنطا ...
ابدا ...
ولا اذا كان اهل العروسه اللى هيعملوا الفرح
حماه وحمى العروسه : بصوا بقى القاعه تاخد على الاقل 500 شخص وطبعا لازم يكون فيه عشا محترم احنا قريبنا ناس مهمين ومش عايزين احراج ...
مع ان الفرح من اسمه فرحه انما بالطريقه دى بيبقى قرحه فى المعده والمريء وليله سودا منقطه بكحلى
الفرحه فى القلب فى مكان بسيط يضم الناس القريبه من العريس والعروسه ...
يا جماعه لو مش احنا اللى هنحاول نحل الكلاكيع دى مين اللى هيحلها ؟؟؟
لازم يبقى لينا راى فى حياتنا لان ببساطه محدش هيعيشها غيرنا
تتخيلوا الحاله لو فضلت كده ولادنا هيعملوا ايه ؟؟؟
اعتقد على ايامهم اى جوازه تحصل بقى بعد كدة هتيجى فى
برنامج عجائب وطرائف
وكمان مش بعيد تدخل موسوعة جينيس للارقام القياسية
وعندى فكره يا ريت كل اللى يقرا الموضوع يحط حل او حاجه مش تقليديه ممكن يعملها فى فرحه او فى اى حاجه فى رحله العذاب والضنى
((الزواج سابقا))
منقول
