أهم درس المفروض نوضحه هو الدرس البسيط جدا اللي بيقول لازم تتعلم أن الحياة ما تمشيش بالبركة فابعد شوية عن قصة مطرح ما ترسي دق لها..
نحاول نكتشف جوانا حاجات تضمن أن تصرفاتنا وأفعالنا يبقي فيها شيء من العقل والحكمة حتي لو كانت تصرفات عادية جدا..
مع الوقت الحكاية هتكبر واحدة واحدة وتلاقي نفسك خبير في التصرف وكل أفعالك بالمسطرة زي الكتاب ما بيقول علي رأي أشرف شاكر بتاع المنطقة العامية في الكورة!
من غير نصايح وطرق وخبرات ودراسات الدكاترة إياهم الحكاية بسيطة بساطة الحلاوة بالقشطة.. مش كيميا يعني في منتهي السهولة ممكن توصل للمعادلة اللي أنت شايفها لسه صعبة وساعات مستحيلة..
ممكن جدا تبقي معلم في تصرفاتك وراجل في كل كلامك وأستاذ في أفكارك ومشاريعك بس الحكاية محتاجة شوية تكتيك.. عارف لعبة المكعبات التي بتجمعها علشان تبني منها بيت شكله حلو أو شركة شكلها كده هيكسر الدنيا لو اشتغلت بجد..
ماكيت بيقول إنك بني آدم منظم حتي لو كنت هاوي ومش ماشي وفي ايدك ريموت كنترول وبتمارس حياتك بشكل طبيعي جدا من غير نظارات هاري بوتر المثقف ولا الأشكال المعقدة إياها اللي باين عليها كل كلمة وكل حركة وكله بحساب ممكن تعيش برنس وحتي "كاجوال"..
الناس تبص لك وتقول بعلو صوتها ذكي جدا. بيعرف يتعامل أصل التعامل ده مدرسة لوحده..
أحسبها كويس كل تفصيلة صغيرة تعدي عليك في الحياة حتي لو كنت غلطان فيها اتعلم منها كويس كل موقف يعدي عليك
مهما كان مش باين وصغير حاول تفهمه وتدرسه وتطلع منه بحكاية جديدة وقرار جديد يساعدك علشان تتغير وتتصرف كويس اوعي تفكر أن أي محاولة بتحاولها حتي لو لا قدر الله فشلت تبقي راحت في الوبا
أكيد هاتستفيد منها خصوصا كل محاولات طرق باب الرزق حاول مرة واتنين وتلاتة ومليون مرة لحد ما هاتدخل أصل مستحيل الباب يفضل مقفول
علطول افتكر حديث النبي محمد صلي الله عليه وسلم يقول فيما معناه: "من اعتاد طرق الأبواب ولج" يعني مسيرها هاتتعدل أوعي تفقد الأمل خليك دايما متفائل حتي لو كل حاجة حواليك بتقول إنك غلطان في التفاؤل ده.
............
ايهاب جمال
هووووبى
العرض العادي
