أنا عايز افهم ليه لما انت تحب حد وتخلص ليه وتبقى مستعد انك تعمل أى حاجة تسعده
وتقف جنبه وتساعده وحاجات مفيش اول من اخر انت ممكن تعملها علشانه
وفى الأخر يخدعك ويخونك ويعدى من جنبك ولا كأنة فى يوم طلب مساعدتك
أو طلب انك تسمع شكوته وتشيل همه وحزنه وياريته بيخدعك علشان حاجة تذكر
لا علشان مصلحه وقضيت وخلاص مبقاش محتاج منك حاجة تانى المشكلة انه بينساك بسرعة
وانت بتفضل فاكره .. فاكر الأيام اللى قضتوها سوا وبتزعل على الزكريات اللى انت عشتها معاه
وبتفضل تسال عليه رغم قسوته واللى عمله معاك .. فى لحظه بيرفعك فى السما فوق وفى لحظة بيدوس عليك برجليه وبيقول ولا كنت أعرفه ولا عايز أعرفه
لية بنفتكر ناس خدعونا وبنبكى عليهم وهما تلاقيهم قاعدين فى كافيه بيحكوا قد ايه انت ضحيت علشانهم وهما غدروا بيك وبيضحكوا هما واللى معاهم عليك ويقولو طيب وأهبل مش فاهم الدنيا صح
الدنيا اللى المفروض ندوس فيها على قلوبنا وننسى يعنى ايه أصحاب وأحباب واخوات
وننسى اننا بشر ونفتكر اننا حجر نعمل أى حاجة احنا عايزينها وندور على مصلحتنا
حتى لو على حساب غيرنا دوس ياعم ميهمكش انت هتزعل على مين ده طيب ومايستاهلش انك حتى تفكر فيه
دلوقتى طيب بقت عيبه وشتيمه بجد مش هزار .. لما تحب تشتم واحد قوله يا طيب
يا غلبان ياللى قلبك كله حب .ليه الطيبين منبوذين يمكن علشان بقوا خلاص نادرين مفيش منهم كتير
بقو حاجة غريبة وسط دنيا كلها قلوب ميته ومشاعر متحجرة . نصيحة صغيره
لو صدف انك قابلت واحد او واحده وحسيت فيهم الطيبة اوعى تسيبهم لانك نادر ما تلاقيهم تانى
أنا بجد عايز أفهم اللى بيخون واحد ده ليه علشان مصلحة ولا علشان ده طبع فيه الغدر والخيانه
ولا هما الناس دول أغبياء لدرجه انهم يخونوا ويخدعوا انسان طيب من غيرأى سبب
وهى الدنيا صحيح بقت كده كلها غدر و خيانه وغم
أبقى زيهم ولا أبقى زى ماأنا ولا أقول المعامله بالمثل وكله محصل بعضه
. يارب يخلى أصحابى كلهم اللى وينسينى اللى خانى منهم وأفضل مع اللى بيحبونى وبحبهم
....................
ايهاب جمال
هووووووووبى
أحبكم فى الله 
